يا ترى ايه التحديات اللي هتواجه مصر فى 2025 ؟ وهل هنقدر نواجه التحديات دي ولا الأمور هتفضل صعبة؟ وإزاي هنتعامل مع مشاكل الدين العام والتضخم؟في 2025 مصر هتواجه تحديات اقتصادية كبيرة أبرزها الالتزامات الخارجية والتضخم وخدمة الدين العام .. ووفقا للسيناريوهات المتشائمة سعر الدولار ممكن يستمر في الارتفاع قدام الجنيه .. بس بوتيرة أقل من السنين اللي فاتت.. حاليًا الدولار بحوالي 51 جنيه وده بعد تخفيضات كبيرة في قيمة الجنيه خلال 2024.. وحاليا الحكومة بتتبنى سياسة سعر صرف مرنة عشان تتجنب التعديلات المفاجئة والكبيرة.من أكبر التحديات اللى هتواجه مصر هي معدل التضخم.. مصر شهدت موجة تضخمية كبيرة من منتصف 2023 واستمرت لحد بداية 2024.. وفي نوفمبر 2024 التضخم وصل لـ25.5% ومن المتوقع إنه يستمر في التباطؤ خلال الشهور الجاية.. توقعات صندوق النقد الدولي بتقول إن التضخم هيوصل لـ17% خلال 2025.وعشان نكافح التضخم البنك المركزي رفع أسعار الفائدة بشكل كبير خلال 2024. . في آخر اجتماع، الفائدة كانت 27.25% للإيداع و28.25% للإقراض.. والتحدي في 2025 هو إعادة أسعار الفائدة لمستويات طبيعية وده هيعتمد على هدوء معدلات التضخم.إيرادات قناة السويس قناة السويس وتراجعها هي كمان من أكبر التحديات .. في 2024 إيرادات قناة السويس انخفضت بسبب التوترات في البحر الأحمر.. الإحصائيات بتقول إن القناة خسرت أكتر من 60% من إيراداتها وده بيعادل حوالي 7 مليار دولار. مع استمرار التوترات.. والتحدي ده هيستمر في 2025.طب إزاي هنتغلب على التحديات دي؟الحكومة هتستمر في تطبيق سياسات نقدية ومالية صارمة عشان تسيطر على التضخم وتدير الدين العام..و ده هيشمل تقليل الإنفاق الحكومي وزيادة الإيرادات من خلال الضرائب والإصلاحات الاقتصادية.مصر كمان هتواصل تنفيذ إصلاحات هيكلية لتحسين بيئة الأعمال وجذب الاستثمارات.. وده هيشمل تطوير البنية التحتية و تحسين التعليم والتدريب وتعزيز الشفافية ومكافحة الفساد.كمان الخبراء شايفين ان الحكومة لازم تركز على تنويع مصادر الدخل القومي زي تعزيز القطاع الزراعي والصناعي والسياحي وتقليل الاعتماد على المصادر التقليدية زي قناة السويس.. بالاضافة الى التعاون مع المؤسسات المالية الدولية زي صندوق النقد الدولي وده هيساعد في توفير الدعم المالي والتقني اللازم لتنفيذ الإصلاحات.. كمان تعزيز العلاقات مع الدول الشقيقة والصديقة هيساهم في جذب استثمارات جديدة.وخد بالك التحديات اللى اتكلمنا عنها فى الفيديو ده كبيرة.. بس بالإرادة السياسية والتعاون بين الحكومة والشعب.. مصر تقدر تتغلب عليها وتحقق نمو اقتصادي مستدام في 2025 وما بعدها كمان.
